बर्दिया । शारदा माध्यमिक विद्यालय मैनापोखर बढैयातालबाट कक्षा १२ मा उत्कृष्ट नतिजा प्राप्त गर्ने विद्यार्थीहरू सुदिप रेग्मी र लक्ष्मी विश्वकर्मालाई खगेश्वर गौतम विद्यार्थी प्रतिभा पुरस्कार प्रदान गरिएको छ । पुरस्कार कोषको आयोजना तथा श्री शारदा माध्यमिक विद्यालय मैनापोखर, बर्दियाको सह आयोजनामा बुधवार विद्यालयमा पुरस्कार हस्तान्तरण गरिएको छ ।

शारदा माध्यमिक विद्यालयमा लामो समय सेवा गरी निवृत्त हुनु भएका शिक्षक खगेश्वर गौतमले आफ्नो नामबाट विक्रम सम्बत २०७६ सालदेखि नियमित रुपमा पुरस्कार वितरण गर्दै आउनु भएको  कोषले जनाएको छ । पुरस्कारको शुरुवातको अक्षय कोषको राशी वृद्धि गरि हाल ३ लाख पुर्याईएको छ । कोषबाट प्राप्त हुने व्याजबाट नै पुरस्कार वितरण हुँदै आएको विद्यालयका प्रधानाध्यापक दीनबन्धु यादवले बताउनुभयो । पुरस्कृत विद्याथीहरुलाई गाउँपालिकाका अध्यक्ष तथा कार्यक्रमका प्रमुख अतिथि गाउँपालिका अध्यक्ष हिमालय त्रिपाठीले पाँच हजार रुपैया नगदसहित प्रमाणपत्र हस्तान्तरण गर्नु भएको छ । 

विद्यालय व्यवस्थापन समितिका अध्यक्ष गोविन्द प्रसाद त्रिपाठीको अध्यक्षतामा सम्पन्न कार्यक्रममा  विशेष अतिथिका रुपमा बढैयाताल गाउँपालिका वडा नम्बर ६ का अध्यक्ष शुक्रराज सापकोटा तथा विद्यालय ब्यवस्थापन समितिका सदस्य सितली थारू रहनु भएको थियो । कार्यक्रममा प्रधानाध्यापक दीनबन्धु यादव, सहायक प्रधानाध्यापक यमनाथ पौडेल तथा पुरस्कार प्राप्त गर्ने विद्यार्थीका अभिभावक, अक्षयकोषका संरक्षक खगेश्वर गौतम तथा दाता प्रतिनिधी यदुनन्दन शर्मा लगायत विद्यालयका शिक्षक तथा विद्यार्थीहरुको सहभागीता थियोे ।