चुरेकुञ्ज, ११ मंसिर, बर्दिया । जिल्ला क्रिकेट संघ बर्दियाको आयोजनामा गुलरिया नगरपालिका वडा नम्वर ४ स्थित कवर्ड हलमा भैरहेको तेस्रो दिनको बर्दिया कप क्रिकेट टी–२० क्रिकेट प्रतिस्पर्धाको पहिलो खेलमा जनजागृति युवा क्लवले बर्दिया क्रिकेट एकेडेमी (बी) लाई पराजीत गरेको छ । 

१६ ओभरमा सबै विकेट गुमाउँदै ९८ रन जोडेको बर्दिया एकेडेमीलाई ३० रनले पराजीत गरेको हो । जनजागृतिले १७ ओभरमा ७ विकेट गुमाउँदै १२८ रन जोड्न सफल भएको थियो । जनजागृतिका निखिल खत्रीले २३ वलमा ५५ रन र राहुल मण्डलले २६ वलमा २६ रनको योगदान दिएका थिए । ३ विकेट लिएका खत्री म्यान उत्कृष्ट घोषित भए ।

राजापुर नगरपालिका र कृष्णसार युवा क्लव विच भएको दोस्रो खेलमा कृष्णसार युवा क्लव पराजित भएको छ । राजापुर नगरपालिकाले १८ ओभरमा ८ विकेटको क्षतीमा १३८ रन जोड्न सफल भएको थियो । कृष्णसारले सबै विकेट गुमाउदै ५४ रनमा समेटियो । राजापुरका सिद्धान्तराज शाहीले ४ विकेट लिँदै २८ रनको योगदान दिए भने लभकुश यादवले २७ रन र अनुज सिंह ठकुरीले २ विकेट लिए । कृष्णसारका निखिल गुप्ताले १० रनको योगदान दिए ।

सिद्धान्त राज शाही उत्कृष्ट खेलाडी घोषित भएका छन् । मंगलवार विहान ८ः३० बजे पहिलो खेल बर्दिया क्रिकेट एकेडेमी (ए) र बर्दिया क्रिकेट एकेडेमी (बी) विच तथा दोस्रो खेल १२ः३० बजे कृष्णसार युवा क्लव र जनजागृति युवा क्लव विच हुने जिल्ला क्रिकेट संघ बर्दियाका सदस्य सिद्धार्थ श्रेष्ठले जानकारी दिएका छन् ।